الخميس، مايو 24، 2012

أحمد عبد ربه يكتب: حوار بين مواطن مسكين وثورجى غلبان


مواطن: يلا بينا ننتخب رئيس علشان البلد تهدى شوية وعلشان تستقر الأوضاع .. وياريت يبقى رئيس توافقي يعني الجيش والشعب إيد واحدة في اختياره ويا سلام لو يكون له علاقة قوية بالجيش وبالنظام المغلوب على أمره اللي كان بيخلينا نعيش في أمان واستقرار ونخلص بقى من الثورة والكلام اللي لا بيودى ولا يجيب ده ... ويا سلام بقى لو الرئيس الجاى يعلن ويقول أنه يقدر يوقف البلطجة في ساعات ويبقى بطل لما يقول أنه الجيش هيحميه وهيتصدى للناس المفترية اللي اسمهم ثوار دول.

ثورجي: يا مصريين بيقولوا الرئيس القادم مالوش صلاحيات واضحة وما فيش دستور وحتى مش مضمون أن الإنتخابات تبقى نزيهة ولا اللجنة العليا لإدارة الإنتخابات الرئاسية حيادية وكمان متحصن قرارتها بالمادة 28 من الإعلان الدستوري يعنى تقبل ترشيح اللى هى شايفاه مناسب وترفض اللى عايزة ترفضه وتاخد القرارات اللى هى عايزاها حتى لو مش من اختصاصتها زى قبول تظلم أحد المرشحين بعد قفل التظلمات وارسالها قانون عزل الفلول للدستورية العليا بسبب تظلم وحاجات كتير تشكك في الإنتخابات الرئاسية.

مواطن: وايه يعنى المهم نوصل لرئيس يحكم البلد وايه يعنى لو الرئيس كان من رجال النظام ولو زوروا الإنتخابات ايه المشكلة ولو الرئيس طلع ديكتاتور شوية هيحصل ايه انا لما اكون ماشي بطاقتي في جيبي ومحترم محدش هيلسمني انما لو أنا بقى وحش الكمين بيوقفني والفساد اهو موجود من 7000 سنة وبعدين بقى سيبكوا من الكلام الكبير بتاع التليفزيون ده احنا شعب عايزين الكرباج علشان نمشى على العجين ما يلخبطوش.

ثورجي: يا جماعة طيب انتخبوا مرشح ثورجى عنده مشروع حقيقى لتقدم البلد وده هيوفرلكم حياة كريمة ويكون المرشح ده دفع التمن وهو بيناضل ضد نظام مبارك وأتسجن علشان البلد وبيحبها بجد بدل المرشحين الفلول دول كانوا بينهبوا ويسرقوا أو على الأقل بيتفرجوا على سيدهم يسرق وينهب ويخرب والفقر والجوع ينتشر اكتر واكتر فى البلد تحت عينيهم وماخدوش موقف واحد لصالح الغلابة والمرضى والفقراء فى مصر.

مواطن: يا سلام يا سلام على الكلام اللي لا يودى ولا يجيب ... يا عم بقولك عايز أعيش في أمان .. البلطجية بيطلعوا على الناس في الطريق ويقلبوهم ويخطفوا البنات ويغتصبوهم ويسرقوا العيال الصغيرة والعربيات والشقق ... لا يا عم أنا عايز رئيس يظبط الأمن ويكون شديد كدة مش بتاع حقوق انسان ومش عارف ايه ... أنا عايز أعيييييش.

ثورجي: طيب يا سيدي يعني أنت لو انتخبت مرشح فلول هتعيش ولو انتخبت مرشح ثورى هتموت؟

مواطن: آه طبعا ... الثورة خربت البلد والثوار وقفوا حالها ازاى بقى أصوت لهم ومن الآخر ماحدش فيهم هيعرف يوقف البلطجية لازم واحد من النظام الى يعمل كده.

ثورجي: اشمعنى بقى واحد من النظام هيعرف يوقف البلطجية والثورجي لأ؟؟

مواطن: أولا علشان كل الأمن في الدولة والنظام هيساعده والجيش هيساعده كمان وهما عارفين ازاى يوصلوا للبلطجية

ثورجي: طيب ممكن أسألك سؤال أخير : ايه رايك في اللى عملوا الثورة؟

مواطن: بصراحة مش عارف بس الى عملوها أول 18 يوم كانوا كويسين وبيحبوا بعض وكان عندهم هدف واضح واحنا كنا فاهمينه وكمان مبارك ده كان ظالم وكلنا عارفين وحرامى كبير والثورة سجنته وسجنت عصابته .. بس بعد كده اندست ناس في وسطهم علشان تستغلهم وتخرب البلد وناس تعمل فوضى وتوقف عجلة الانتاج وكدة ... وعموما هما بيقولوا في التليفزيون أن بمجرد ماهيبقى فيه رئيس كل مشاكل مصر هتتحل بقى ونخلص من الفترة الإنتقالية دي وأنا مش عايز اكتر من اني اكون في أمان وأهو المجلس العسكرى هيسلم السلطة لرئيس ونخلص كمان من الكلام بتاع يسقط يسقط حكم العسكر والجيش لازم يمشى والكلام اللي وقف حالنا أكتر من سنة ده ... كفاية بقى حرام عليكم

ثورجي: هههههههههه الناس فاهمة أنه بإجراء انتخابات رئاسية والتسليم المزعوم للسلطة ولمرشح فلول كمان المشاكل هتتوقف تماما وكل شئ هيبقى تمام. هنشوف

هناك تعليق واحد:

  1. الكلام ده انا شوفته بنفسى فى الانتخابات انهاردة

    ردحذف