الثلاثاء، أبريل 03، 2012

محمد العليمي يكتب : طبيخ سياسي


ما هو (الطبيخ) ؟ ...

(الطبيخ) هو مجموعة من الخضروات المنفصلة قد لا تكون ذات صلة ببعضها وقد لا تتخيل أنها سوف تتجانس سويا والتي ما إن وضعت مع بعضها البعض إلا وتحولت إلى أكلة معينة ..

وقد يعجبك (الطبيخ) أو لا ولكن في بلدنا تكون مُجبر على أكله سواء شأت أم أبيت ؛ فطباخ بلدنا لا يستمع إلى أحد ويُجبرك على أكل ما يروق له .

والآن مع أول (طبخة) واللي بتتكوّن من :

رئيس مخلوع أو متنحي الله أعلم + مجلس عسكري عينه الرئيس المخلوع + محاكمة + دلائل إدانة هزيلة + دلائل إدانة تم تدميرها ..
نخلط المكونات ببعض وهتدينا في الأخر محاكمة مسرحية يطلع فيها الرئيس براءة واحتمال يرفع قضية تعويض وينزل مرشح للرئاسة .

هنعمل أكلة أسمها (مرشحين للرئاسة من النظام القديم) وهي بتتكوّن من عدة أطباق :

أول طبق بيتكوّن من : رئيس وزراء فاشل جه بعد جمعة الغضب + حاجة قالت له أنه ممكن يبقى رئيس مع أنه فشل حتى يبقى رئيس وزراء + نصيبة إن فيه ناس عايزاه رئيس ..
تاني طبق : وزير خارجية سابق وأمين جامعة الدول وفضل ساكت طول حكم المخلوع + رغبته إنه يبقى رئيس للجمهورية وكأنه بيقول للشعب " مالكومش غيري ينفعكم رئيس" + نصيبة تانية أن فيه ناس عايزاه رئيس برضه .

تالت طبخة معانا بتتكوّن من :
إعلامي فاشل وجاهل بيتطاول على الثورة والثوار + مجلس عسكري بيدّعي أنه حمى الثورة وأنه بيقدّر الثوار .. نرش شوية دعم وحماية من المجلس العسكري على الإعلامي ونسيبهم شوية في ميدان العباسية .

وجالنا رسالة من مشاهد بيطلب فيها طريقة عمل سَلَطة البرلمان .. ودي تحضيرها سهل وبسيط جدا ..
هنجيب ثورة ونخليها تُسقط نظام .. ونعمل استفتاء على إعلان دستوري ونوافق عليه .. ونعمل إعلان دستوري غير اللي أتوافق عليه خالص .. وبعدها نعمل انتخابات نزيهة ويكسب فيها الإخوان اللي عمرهم ما كانوا هيكسبوا قبل الثورة .. ونسمي البرلمان برلمان ثورة .. ونستنى عليه أسبوعين.. أو شهر .. أو تلاتة .. لحد ما نكتشف في الأخر إن برلمان الثورة بقى بيحقق مطالب الثورة .. المضادة .

رابع وصفة معانا أسمها لجنة الانتخابات الرئاسية  وبتتكوّن من :
رئيس اللجنة وهو قاضي سابق في القضاء العسكري + عضو سابق في لجنة انتخابات 2010 المزورة + أحد المتورطين في تهريب المتهمين في قضية التمويل الأجنبي ..
هنحط دول مع بعض ونسيبهم يشرفوا على الانتخابات الرئاسية ونستنى منهم النزاهة إن شاء الله ..
معانا برضه طبق الحلو وده مخصوص للتسلية ..
هنجيب مجلس شعب ونحط فيه أغلبية من الإخوان ومعاهم سلفيين ونجيب لهم كل أسبوعين رئيس الوزراء عشان يسحبوا منه الثقة .. وهيطلع لنا في الأخر وجبة من التصفيق والتهليل لرئيس الوزراء .

ودلوقتي ميعادنا مع الطبق الرئيسي اللي بيتكوّن من 19 شخص ..
نسيببهم في الحكم لمدة سنة ونص لحد ما يخربوا البلد ونحط معاهم مجلس شعب بس يكون أغلبيته طرية عشان نعرف نشكلّها على مزاج ال19 عضو ..

ومع أنه مكتوب في تعليمات الاستخدام أن الطبخة دي هتطلع عادي معاك في شهر يونيو إلا أنك ممكن لما تيجي تطلّعها تلاقيها لزقت ومش راضية تتطلع ..

تحذير : هذه الوجبات لا تصلح للاستخدام الآدمي وكاتب المقالة غير مسئول عن أية أضرار تنتج عن تناولها ولكن إذا كانت عجباك وموافق عليها فيبقى أنتا اللي جبته لنفسك ..

ليست هناك تعليقات:

إرسال تعليق