الاثنين، مارس 19، 2012

زهرة نديم تكتب : الرئيس التوافقي


لما تكون شخصية ملهاش خالص فى السياسة وفجأة تلاقى نفسك بتسمع مصطلحات في الفضائيات بتعاملك على انك فاهم كل اللي بيحصل .. متسكتش لازم تسأل

يعنى لو أنت شاب وليك في البحث على النت دور واعرف عشان محدش في زمننا ده هييجي لحد عندك ويشرح .. أما لو حضرتك كبير في السن مش عيب تسأل ابنك أو بنتك أو حتى جارك المهم كلنا نفهم عشان أما ننزل انتخابات ويقولولنا ده فلان رئيسكم التوافقي نعرف يعنى إيه توافقي

بص ياسيدى

الرئيس التوافقي ده يعنى رئيس كل الأحزاب والإتجاهات السياسية توافق عليه "رغم أنى شايفة إن تحقيق ده صعب" بس ده معناه يعنى واحد كدة واخد له 99.9 % في الإنتخابات بس بشرط انتخابات من غير شعب ولو شاركنا هنقول بس في الأخر نعم أو لا لكن اختيار الشخص نفسه مش دورك خالص يعنى كله من حقه يقول رأيه ماعدا أنا وأنت والناس اللي على القهوة و أصحابك في النادي لكن كل القيادات العليا في الدولة مــــــــــــــــــــــوافـــقــة !

بيفكرني الموضوع ده قوى ببيت العيلة لما الأب والأم يختاروا حاجة ويكون كل دور الأولاد أنهم ينفذوها زى الأكل أو الشرب وفى بيوت كتيره مجال التعليم كمان
يعنى أما يجيلك عريس و ماما وبابا وخالتك وعمتك يوافقوا وينزلوا يجيبوا الشبكة والفستان وينسوا يسألوك انتى موافقة ولا لا أحسن ترفضي وتضيعي فرحتهم
يعنى تروح المدرسة تلاقى المدرس اللي بنحبه وبيدرسلك طول السنة أتغير وتسأل ليه يقولولك شرحه مش عاجب المدير رغم إن أنت اللي بتدرس !
يعنى أما تروح البيت تلاقي الغداء محشى كرنب وأنت مبتحبهوش بس هما اتفقوا يعملوه انهارده عشان خالتك اللي بتموت فيه جايه تتغدى معاكوا.

من الأخر الرئيس التوافقي يعنى رئيس مهم قوى انه يعجب كل اللي ليهم سلطة عليك ومش مهم خالص نهائي أنه يعجب حضرتك لأن ده تدخل زائد منك في شئون أنت  متفهمهاش
يا أخي خليك في حالك !!!!!

أما عن تقسيم مصر الموضوع ده حقيقي جدا جدا جدا ده توكيد يفيد التخويف عشان تبقى فاهم بس الموضوع ده أول ما تسمعه يخضك قوى ومتبقاش عارف في حد يقدر يعمل كده فعلا مصر تبقى 3 دول طيب ازاى لكن أما تفكر كده تقول لنفسك مايمكن تكون فزاعة بس بيخوفونا بيها من إن الشعب ينتخب رئيس اخوانى ولا سلفى يقوم المسيحين يزعلوا نروح حاطين خط في النص وكل واحد ياخد نص مصر يبقى عندنا نصين غير النوبة هوب مصر بقت دويلات يا ولاد بس أحنا كمصريين صعب قوى نعمل كده وسيبكم بقى من المؤامرات والمخططات المدبرة التي تنتظر إن تفتك بمصر
بعرف أقول كلام كبير قوى صح

لا بجد مش استهتار بقية مصر وقناة السويس وكل المميزات اللي فيها ومدركة جدا إن فعلا في مؤامرات بس أنت لو عارف عدوك بيفكر في إيه يبقى هو ساذج قوى وهو لو أدرك انك خلاص عرفت أكيد مش هينفذ المؤامرة دي هيفكر في غيرها عشان كده بستبعد موضوع التقسيم ده خالص ونفسي نبقى أحرار في اختيار اى رئيس نشوفه مناسب اسلامى بقى ليبرالى مش مهم .. المهم يعمل حاجة لمصر للفقراء للناس اللي ماتت من الفقر والجهل والإهمال وشايفة إن مصر بحالها ده مش جايزة للى هيحكمها ده هيطلع عينه عشان يصلح بس عشر اللي أتدمر السنين اللي فاتت عشان كده اختار بجد أنسى   اى حد يقولك انتخب كذا .... بالله عليك اختار اللي تشوف فيه الصالح متفكرش في اى حاجة  تانية ..............

هناك تعليقان (2):

  1. ممممممم مش بطال
    هههههههههههه لا بهزر طبعا
    كلام جميييييل جدا والله يا زوزو يخربيتك مخبيه الحاجات دى فين
    واحب اصارحك انى اول مره اعرف يعنى ايه رئيس توافقى بجد
    بجد استفدت جدا من الموضوع
    وعجبنى اسلوبك جدا برغم الرتم السررررريع معرفش ليه حسيت انى شايفاكى وبتتكلمى بسررعه حتى بقيت انا اقرا بسرعه
    بس بجد ماشاء الله اسلوب جميل واختيار كلمات اجمل والهدف اجمل واجمل

    ردحذف
  2. جميل اوى مشاء الله عليكى

    ردحذف